Kwa niaba ya Bodi, Menejimenti na Wanachama wa TANROADS SACCOS LIMITED, ninayo furaha kubwa kukukaribisha kutembelea tovuti yetu rasmi. Tovuti hii imeandaliwa kwa lengo la kuwapatia wanachama, wadau na umma kwa ujumla taarifa sahihi kuhusu shughuli, huduma, bidhaa na maendeleo mbalimbali ya Chama chetu. Tunaamini kuwa matumizi ya Teknolojia ya Habari na Mawasiliano (TEHAMA) ni nyenzo muhimu katika kuimarisha uwazi, uwajibikaji na utoaji wa huduma bora kwa Wanachama wetu.

TANROADS SACCOS LIMITED ni Chama cha Ushirika wa Akiba na Mikopo kilichosajiliwa kwa mujibu wa Sheria za Jamhuri ya Muungano wa Tanzania kwa lengo la kuwawezesha Wanachama wake kiuchumi kupitia huduma za kuweka Akiba, kununua Hisa na kutoa mikopo kwa Wanachama wake. Tangu kuanzishwa kwake mwaka 2006, Chama kimeendelea kukua na kuimarika kutokana na ushiriki wa wanachama wake, uongozi thabiti na usimamizi bora wa rasilimali.

Kupitia tovuti hii utaweza kupata taarifa mbalimbali ikiwemo bidhaa za mikopo na akiba, taarifa za utendaji wa Chama, matangazo muhimu, fursa mbalimbali, pamoja na habari zinazohusu maendeleo ya Chama. Aidha, tunatarajia tovuti hii kuwa daraja muhimu la mawasiliano kati ya Chama na wadau wake wote.

Bodi ya Chama itaendelea kusimamia kwa karibu utekelezaji wa mipango na mikakati inayolenga kuongeza thamani kwa Wanachama, kuimarisha uthabiti wa kifedha wa Chama na kukuza ustawi wa kijamii na kiuchumi wa Wanachama wetu.

Tunawashukuru Wanachama wetu kwa imani na ushirikiano wanaoendelea kuuonyesha kwa Chama. Vilevile, tunawashukuru wadau wote wanaoshirikiana nasi katika safari ya kujenga taasisi imara, endelevu na yenye mchango chanya kwa maendeleo ya sekta ya ushirika nchini.

Karibu sana TANROADS SACCOS LIMITED.